عندي رسالة
عايزة أبعتها للسما…بشكل سريع وعاجل…
مش عارفة أبعتها إيميل… ولا مع الحمام الزاجل…
عايزاها توصل لربنا…من غير مشاكل…
جوه الرسالة كلام كثير بخط مش واضح…
كلام من فكر تايه وسارح…
في الرسالة راسمة شوية أشكال وملامح…
أشكال لناس محيراني…وشوية مواقف مضايقاني…
وعن الوصول لهدفي معطلاني…
وكمان فيه حبه شخبطة…ونقط وحروف متلخبطة…
نتيجة أفكار مشوشة متخبطة…
لكن واثقة أنك هتفهم معانيها…
لأن كل شفرة بترسم حياتي…أنت وحدك قاريها…
عشان لخفايا القلب دايما كاشف
وأسباب فرحي وحزني…عارف
دي خطواتي عندك مرسومة
وأفكاري المتلخبطة…واضحة لك ومفهومة…
ولتفاصيل حياتي…أنت شايف
عشان كده هبعتلك كل كلمة جوايا
لأني بحبك…
منك…مش خايف.