الشعب المصري… مهموم بالأحداث… أو غافل عنها… لكنه الشارع المصري
* بيقولوا الخوف بعد كده مانلاقيش العيش… المشكلة كمان مانلاقيش الفلوس إللي ناكل بيها العيش.
مدرس موسيقي
* أكثر الدول ليبرالية فيها حزبين بس وبتتمتع بديموقراطية حقيقية… ليه كل الأحزاب إللي تتوزن بالكيلو في مصر دي؟!.
محاسب
* بجد خايفين من المستقبل… بالنسبة لنا مجهول جدا.
مدرس إنجليزي
* صحيح موضوع قنا مؤلم لنا كأقباط… لكن طالما اجتمع عنصري الأمة علي هدف واحد يبقي مصر بخير.
محام
* لحد إمتي الطماطم هاتمرجحنا معاها شغالة في الطالع والنازل… والطالع أكتر.
ربة منزل
** تعليقا علي ارتفاع أسعار الطماطم منذ قرابة شهر وحتي الآن.
* لو جمعوا الفلوس والفيلات والشقق والشاليهات من رموز النظام السابق بعد الحكم عليهم… الحاجات دي كفيلة تسد ديون مصر وزيادة.
مستخلص جمركي
* الأمن لازم يرجع بتكنولوجيا جديدة ومهابة… يعني أقسام الشرطة تبقي مجهزة بطريقة مشرفة حتي في القري… كل ده ممكن يساعد في رجوع هيبة الشرطة.
صاحب محل ملابس
* إحنا لسه متاخدين شوية في هوجة الثورة… لكن ساعات بنقف مع نفسنا ونسأل… إيه اتحقق ولمسناه في شغلنا من ساعة الثورة.
موظف قطاع خاص
* الحاجة الوحيدة إللي من حق مبارك… هي المحطة إللي باسمه خدوا منه كل حاجة… لكن ينسب ليه مترو الأنفاق في مصر كلها وده حقه بلاش نظلمه في دي طالما بنادي بالديموقراطية.
موجه علي المعاش
* مافيش رقابة ليه علي أسعار الملابس… سعرها نار وقماش ما يستهلش!!!.
مواطنة في وسط القاهرة
* الحاجة الوحيدة إللي لمسناها بعد الثورة, إن أسلوب بتوع الشرطة اتغير وبطلنا نشتغل لحسابهم, ومانخافش منهم ومن أذيتهم.
سائق تاكسي