الشعب المصري… مهموم بالأحداث… أو غافل عنها… لكنه الشارع المصري
*تتعمل جلسات صلح ماشي, لكن ده مايمنعش إن إللي غلط يعاقب بالقانون.
إعلامية
** تعليقا علي عقد جلسات صلح في حادثتي قطع أذن مواطن قبطي في قنا… وحرق كنيسة أطفيح!!
* لو كان مشكلة هاتنتهي بجلسة صلح يبقي كل واحد هايعمل إللي هو عاوزه والآخر هايصالحوه علي المجني عليه وكأن مافيش حاجة حصلت.
محاسب
* فجأة منعوني من إذاعة برنامجي أنا وكل إللي معايا ومنعوا مذيعين تانين وكل ده بحجة الرواتب ومحدش إتناقش معانا في حاجة.
مذيعة بالتليفزيون المصري
* خايفين مكاسب الثورة تتاخد مننا لحساب تيارات بعينها.
من المتظاهرين في 25 يناير
* كنا بنحلم بدولة مدنية تسودها الديموقراطية… لكن إللي بيحصل حوالينا بيفزعنا ويحسسنا إن ممكن البلد تبقي في يوم دولة دينية.
موظفة قطاع خاص
* خصموا من مرتباتنا والأسعار زادت… هي دي نتايج الثورة؟!! جوع وفتن طائفية وبلطجية؟!
موظف قطاع عام
* زي ما عملوا قانون يجرم التحريض علي المظاهرات والاعتصامات ما يجرموا الشائعات ومصدرها زي ما خلوا السيدات والبنات مفزوعين الأسبوع إللي فات من الخوف من الخروج في الشوارع لغير المحجبات.
محاسبة في بنك
* إحنا بنروح المدرسة ونعمل إللي علينا, لكن فيه غياب للطلبة كثير جدا وإدارة المدارس أكيد هتراعي ده.
مدرس
* أكيد كدبة أبريل السنة دي كدبات أبريل, ما الأحداث بقت بالهبل يعني خطف بنات- فتنة- مجاعة- اغتيال- استقالة مسئول- رجوع مبارك… ياللا ماهو مافعش رقابة علي حد وإللي عاوز يقول حاجة يقولها.
سائق تاكسي
* أسعار الخضار غليت ليه… طب دي مالها ومال الإستيراد والتصدير والبورصة!!
ربة منزل ليسانس آداب
* محدش طلع من المسئولين لحد دلوقتي يبرر لنا ارتفاع أسعار الحبوب والبقوليات والخضار… إحنا بنرجع لورا ولا إيه!
موظف في مصنع