الشعب المصري… مهموم بالأحداث… أو غافل عنها… لكنه الشارع المصري
* كان نفسنا نجيب خروف للعيد زي كل سنة, لكن هانعمل إيه في الغلا ده… عليه العوض يا خروف العيد.
موظف قطاع عام
* والله فيه مرشحين بيضحوا حتي بعد عيد الضحية… لكن بيضحوا بأرواح ناس عشان يكسبوا في البرلمان… بالذمة مش بيخافوا ربنا دول؟!
محاسب
* مترو الأنفاق بتعدي عليه أوقات بيبقي عذاب اليومين دول… وقوف وعطل متكرر لدرجة بنتأخر علي أشغالنا وعيالنا ومش عارفين ليه كل ده!
موظفة
* خبطنا علي كل باب ماخليناش… بين وزارة الخارجية, لسفارة الصومال لغيره ولحد دلوقتي محدش وصل لحل.
سيدة من القاهرة
** تعليقا علي اختطاف مصريين بالصومال منذ حوالي 4 شهور وعدم التوصل لحلول.
* يا ناس دي أرواح بني آدمين وأصحاب أسر وشباب أرجوكم ساعدونا…
زوجة أحد المختطفين
* هما عاوزين يفرضوا علينا الحرس الجامعي عشان يمنعونا من مزاولة العمل السياسي.
طالبة بجامعة القاهرة
* لما يفرضوا الحرس علينا القرار يتنفذ في وقته, ولما يلغوا الحرس القرار مايتنفذش تقريبا!!
طالب آخر
* حد يصدق الكلام الفارغ بتاع السحر والشعوذة… قال النيجر كسبت المنتخب بمعزة مسحورة… ده كلام فاضي.
صيدلي
* سهلة نجيب لهم المرة الجاية كلب مسحور أو قطة مسحورة ونرميها ليهم في الملعب ومافيش أكتر من المشعوذين وبتوع السحر عندنا ونشوف مين هايغلب.
صاحب مقهي
* كل حاجة بقت صيني فاضل عنينا تضيق ونتكلم صيني.
بائع ملابس
* بيقولوا هايصدروا القطن وسعر الملابس ها يغلي, يعني أهم حاجتين مش هنلاقيهم الأكل واللبس!!
صاحب محل بقالة