الشعب المصري..مهموم بالأحداث..أو غافل عنها
…لكنه الشارع المصري
* موضوع ضرب المدرسين للتلاميذ موجود لكن وسائل الإعلام بدأت تنفيه ليه,يعني هو مش ظاهرة.
صحفية
* علي فكرة ضرب الطلبة ده موجود في المدارس الحكومية بس,يعني الحل لازم يبدأ بالمدارس دي وبعدين يشوفوا لو فيه مدارس خاصة, ولو إن ماظنش.
محام
* المفروض يعينوا هاني رمزي رئيس للحكومة القادمة عشان فيلمه##عايز حقي##,هو أكثر واحد فهمنا موضوع الأصول…
كاتب ساخر
* أنا عاوز أعرف ليه إللي فوق الـ 21 سنة بس من حقهم شراء الأسهم في موضوع الأصول طب والأقل من من 21 سنة ومعاه بطاقة تحقيق شخصية؟؟.
مدرس موسيقي
* بطالة قلة فلوس..وعاوزين ما يبقاش فيه تحرش؟!!.
سائق توك توك
* بصراحة أكثر حاجة الحكومة ملتزمة بيها هي التطعيمات واللهم لاحسد.
ربة منزل
* لو اتفتح موضوع نقل الأعضاء يبقي لازم الدولة تتوخي الحذر في كل كبيرة وصغيرة في القانون ماتسبش ثغرة واحدة لحد من المتلاعبين بالقانون.
طبيب
* بركة إن الدهب رخص شوية وعقبال الفراخ واللحمة إللي مش راضيين ينزلوا أبدا.
صاحب محل فراخ
* لحد النهاردة مش عارف أشتري الكتب..وامتحانات التيرم قربت..أجيب ثمنهم منين مش كفاية الكارنية عشان أدخل الامتحان…
طالب جامعي
* الشعب مطحون من كل حاجة والماتشات هي الحاجة الوحيدة إللي بينفس فيها عن نفسه إيه ذنبه يتحرم من ماتش الأهلي والزمالك عشان حرب اسمها الفضائيات.
مصور