الشعب المصري… مهموم بالأحداث… أو غافل عنها… لكنه الشارع المصري
* لما كانت أسعار اللحوم بتغلي, كنا بنقول الشعب يقضيها بطاطس أو أي خضار وفاكهة وخلاص, دلوقتي الشعب ياكل إيه بعد ما كل حاجة غليت وأولها أرخص الخضار زي الطماطم؟!!!.
كاتب صحفي
* اصرفوا وجبة غذائية للطلبة في المدارس وإلا الأجيال الجاية هاتطلع نصها متخلف أو قزم أو معدوم العافية.
إخصائية اجتماعية علي المعاش
* لازم يكون فيه أمن علي كل مدرسة سواء في الحضر أو الريف.
ولي أمر ثانوي
* * تعليقا علي أعمال التحرش والمعاكسة بطالبات في الدقهلية
* أهو طالبات المدارس بيروحوا المدرسة بملابس لائقة يعني مش في عيد…. ليه التحرش؟. فيه حاجة مخيفة في مجتمعنا بدأت تظهر ربنا يستر.
صيدلانية
* ملايين بتتصرف علي شبكات الصرف الصحي ومياه الشرب كل سنة ومنتظرين النتيجة من سنين!!!.
مواطن بالخصوص
* بيقولوا فيه زيادة في أسعار فواتير الكهرباء وإللي بنسمعه النهاردة في أي زيادة أسعار بيتحقق بسرعة الصاروخ بكرة.. وربنا يستر.
موظف
* أسعار كل حاجة بقت نار… حتي أسعار البلطجية.
إعلامي
* * تعليقا علي استخدام بلطجية أثناء الحملات الانتخابية لصالح بعض المرشحين.
* وهو أنا لما أشوف بلطجية بتروج لعضو مجلس شعب علي حساب تاني هانتخبه؟ طبعا استحالة.
محاسب
* حوافزنا وبدلاتنا هتبقي كام يعني وسط حوافز رؤساء الأقسام والمسئولين بالمستشفي.
عاملة بمستشفي الحسين الجامعي
* بقالي 11 سنة متثبت بشكل مؤقت!!.
موظف بالمستشفي
* يقولوا اهتموا بالأشجار والزراعة والحي نفسه أتلف الأشجار إللي قدام بيتي وبيوت كثيرة حوالينا!!!.
مواطن بالحي السابع مدينة نصر
* ياريت الماتشات الجاية بين أي فريق مصري وجزائري تكون علي أرض محايدة.
ناقد رياضي
* * تعليقا علي أحداث الشغب من قبل بعض التونسيين أثناء مباراة الأهلي والترجي التونسي في القاهرة الأسبوع الماضي.