الشعب المصري…مهموم بالأحداث…أو غافل عنها…لكنه الشارع المصري
*قدام عنينا أكثر من شوال دقيق يخرج بره المخبز يتباع طبعا بسعر أعلي والباقي يخبزوه وعنه ماكفي الجيش اللي واقف في الطابور.
مواطن من حي شعبي
*وعلي فكرة موظفان في قطاعات حكومية وخاصة بيشتروا الدقيق من المخبز ويخبزوه في بيوتهم.
سيدة من القليوبية
*أحسن حاجة عملها عصام الحضري رجوعه واستسلامه لقرارات النادي الأهلي..هي دي أخلاق اللاعيبة.
مشجع أهلاوي
*الزمالك في أزمة وبقالو 4 سنين….وكل شوية نسمع إنه في أزمة طب ما حلوهاش ليه من أول سنة أزمة؟
مشجع زملكاوي
*كان الأول اللي معاه واسطة يشتغل في الحكومة,دلوقتي اللي معاه واسطة ياخد عيش من غير ما يقف 4 ساعات في الطابور.
موظف
*عرضت الأرض بتاعتي للبيع ومحدش راضي يشيريها,لأن مين هايبني وسط ارتفاع سعر الحديد والأسمنت وده أساس البناء حسبنا الله ونعم الوكيل.
تاجر
*لازم الدولة تشوف طلبات الأطباء,لأن قرار توقعهم عن العمل فيه خطورة شديدة جدا علي المرضي وممكن الموضوع يطول معاهم.
محاسبة
*في الحالة دي نستورد أطباء من بره بمليارات الدولارات…عادي ما هي كل حاجة بنستوردها.
محاسبة آخر
*فاتورة الكهرباء جاءت لنا 120جنيه,ولما بلغت قالولي أدفعي الأول وبعدين نشوف المشكلة دي!!
سيدة من عين شمس
*لازم الكنيسة توضح ليه حكمت المحكمة بالطلاق لعاطف كيرلس,لأن الطلاق ممنوع عندنا إلا لعلة الزني عشان وسائل الإعلام ما تستخدمش الخبر ده بطريقة غير مفهومة وتوصل للناس علي إن الطلاق أصبح متاح عندنا.
كاهن
*بأبيع المخزون اللي عندي علي السعر القديم,والبضاعة الجديدة هي اللي بحسبها علي السعر الجديد,إحنا بنعامل ضميرنا الأول.
صاحب سوبر ماركت