الشعب المصري… مهموم بالأحداث… أوغافل عنها… لكنه الشارع المصري
* نظام التعليم قائم علي المناقشة بين الطالب والأستاذ… إزاي ده هيتحقق لما ولادنا يتلقوا التعليم عن طريق الإنترنت!!.
ولي أمر بالجيزة
** تعليقا علي اتجاه وزارة التربية والتعليم لبث المناهج التعليمية علي شبكة الإنترنت.
* ياخوانا ده مش النظام الثابت لكن ده حل مؤقت لحد ما موضوع إنفلونزا الخنازير يعدي علي خير وبعدها ترجع الميه لمجاريها والولاد يروحوا المدرسة.
مدرس
* مهما طمنوننا في التليفزيون إن المستشفيات الحكومية بتقوم بواجبها, إللي بنشوفه يخلينا مانصدقش.. وربنا يكفينا شر دخول مستشفي حكومة.
سيدة في حي شعبي
* لو قرروا قفل المدارس في أول نوفمبر أو ما قرروش إحنا مش هنودي ولادنا المدارس في الفترة دي لحد يناير.
موظف
* والله الواحد مرعوب من الأرض إللي تحتيه أحسن تهبط.
صاحب محل بالعباسية
** تعليقا علي الهبوط الأرضي الذي شهدته محافظتي الفيوم والجيزة الفترة الأخيرة.
* واقفة من الساعة تسعة الصبح لخمسة المغرب علشان أصرف معاشي… إحنا بني آدميين ولا عبيد؟!!.
سيدة من الإسكندرية
* طب لما ينقلوا السوق للعبور… نصرف كام مواصلات عشان نروح سوق العبور والزبون بتاعنا يجيي لنا فين؟!.
بائع في سوق شبرا
** تعليقا علي قرار نقل إحدي الأسواق بشبرا لسوق العبور.
* المفروض يلغوا أجزاء من المنهج علشان ولادنا يقدروا يلموا المنهج وسط الظروف إللي إحنا فيها من احتمال إغلاق المدارس كل ما وباء إنفلونزا الخنازير يزيد انتشاره.
ولي أمر طالبة أولي ثانوي
*الدوري نار نار والزمالك محتار ياخد الدوري ولا خايف من الحسد.
مشجع أهلاوي
* عطست في مترو الأنفاق… الناس بصت لي علي أني جربان أو كائن غريب.
راكب