الشعب المصري.. مهموم بالأحداث.. أو غافل عنها.. لكنه الشارع المصري
* هي المدارس الحكومية هتعمل أيه لمواجهة إنفلونزا الخنازير؟. هاتهتم بالنظافة ولا كثافة الفصول ولا توعية الأولاد ولا.. ولا..؟.
موظفة
* عندنا استعداد إن التيرم يتلغي كله في سبيل أمان ولادنا وكل الشعب.. صحة ولادنا أهم.
ولي أمر بالقاهرة
* يبدأوا الدراسة في شهر يناير ويكملوا الدراسة لآخر السنة من غير إجازات.. وإحنا موافقين علي ده.
ولي أمر بالقليوبية
* عاوزين نعرف المصل نازل ولا لأ.. لو مش نازل أنا هأقدم اعتذار رسمي لمدارس ولادي السنة دي.
سكرتيرة في شركة خاصة
* بيقولوا الأمصال مش هتكفي وهايتم توزيعها علي كبار البلد.. بس الغلابة إللي ممكن يسببوا عدوي مش لمصر بس لكن للعالم كله أكثر.
صحفية
* قريت خبر إن فيه 20 ألف حالة تعدي علي الأراض الزراعية.. بالذمة ده كلام والآخر يقولوا الخضار والفواكه مرشوشة عشان تكبر بسرعة ويزودوا المحصول والمواطن الضحية.
محاسب
* العيد مع المدارس وإحنا خارجين من رمضان خلاني أغني ظلموه.. ولسة.
موظف قطاع عام
* ركبت مع سواق توك توك في ثالثة ابتدائي والله مش بهزر.. يا ناس فين الرقابة؟!.
سيدة من القليوبية
* إحنا عاوزين نحس بالأمان بجد.. أوبئة وقلة شغل وغيره وغيره.. ربنا يستر.
خريجة جامعة
* ياريت يرجعوا الجمعيات التعاونية تاني لكن بشكل جديد ومنظم عشان محدودي الدخل.
مدرسة
* هي البلد مستعدة فعلا لمواجهة وباء إنفلونزا الخنازير في حالة انتشاره.. أنا وكل الناس عاوزين نطمن.
طبيب أسنان