الشعب المصري.. مهموم بالأحداث.. أو غافل عنها.. لكنه الشارع المصري
* بتوع الأنابيب بيستغلوا شهر رمضان ويرفعوا السعر لأكثر من عشرة جنيه ولما نكلمهم يقولوا كل سنة وأنت طيب أحنا في رمضان يا بيه!!.
موظف
* أول يوم رمضان فطرنا لحمة وبعد كدة كملناها أورديحي وده حال الغلابة إللي زيينا.
سباك في منطقة عشوائية
* محدش قالنا حاجة عن الأمصال بتاعت إنفلونزا الخنازير عاوزين الموضوع ده يتم قبل المدارس.
سكرتيرة في شركة
* بيقولوا الأمصال دي إللي معاهم فلوس.. طب دا الغلابة عددهم أكثر في بلدنا ودول ممكن يسببوا عدوي للبلد كلها يعني أيه الأمصال للمقتدرين بس؟!.
عامل في محل
* سكر التموين عاوز سكر عشان يحليه.. يعني نسيب سكر التموين المدعم ونشتري سمر من برة؟!.
موظف قطاع عام
* 40مسلسل أو أكثر في رمضان ليه يعني.. طب وطول السنة المشاهد مالهوش لازمة؟!.. ما يوزعوا المسلسلات دي طول السنة في أوقات مشاهدة مرتفعة.
مهندس
* أنا حاسس إن نص الأطفال دلوقتي أول ما يتولدوا بيحطوهم في حضانات, هو ليه كده, ولا أنا بقول كلام وخلاص!!.
مدير مشتريات بفندق
* البطاطس بقت كلها عفن بني وبيقولوا نتخلص من البطاطس دي يعني كل كيلو بطاطس بيطلع منه ربع كيلو بطاطس سليمة.
ربة منزل
* أنا عاوز أخطب علي عيد الفطر وعشان غلاء المعيشة إللي إحنا فيه ها جيب دبلتين دهب وباقي الشبكة دهب صيني وخلي الشعب يفرح ويعيش اللحظة.
عامل في شركة خاصة