الشعب المصري.. مهموم بالأحداث.. أو غافل عنها.. لكنه الشارع المصري
* من سنة 1994 ما فيش تعيين للأطباء عندنا.. ولا لينا بدل عدوي ولا بدل صحي.
طبيب بيطري
* باخد 90 جنيه في الشهر.. باشتغل في معمل بدمياط.. بالذمة ده مرتب!!.
طبيبة بيطرية
* تحديد عيد للنظافة حسسنا إننا لينا كيان وياريت تتغير نظرة الناس لينا بقي.
عامل نظافة
* أنا كفيف البصر ومحتاج لمرافق لي.. وطبعا بياخد حوالي 4/1 مرتبي مش برضو لازم يعملوا حساب للنقطة دي في معاملة الكفيف ماديا.
دكتور كفيف
* اعتز بديني وثابتة عليه, لكن إيه إللي يمنع من تكوين صداقات وعلاقات مودة وتآخي مع الدين الآخر.. لازم نظرة المجتمع تتغير.
فتاة مسلمة علي الفيس بوك
* فيه ناس في بلدنا بتشتري رجول الفراخ تطبخ عليها.. وحتي رجول الفراخ غليت ومش لاقينها.
موظف علي المعاش
* الوقفات الاحتجاجية في مصر بقت موضة جديدة.
إعلامية
* بقينا نخاف نمشي بولادنا في الشوارع من كتر حوادث الخطف إللي بنسمعها عن خطف الأطفال.
سيدة من شبرا الخيمة
* أكثر حوادث الخطف عن طريق التوك توك.. بخطف الأطفال والجري بيهم وطبعا محدش يعرف يجيبهم.
سيدة من الخصوص
* الفرق بين الكورة المصرية والأجنبية إن الأخيرة عمل جاد والثانية هواية.
مشجع حائر
* علي فكرة أحنا أكتر ناس بنحافظ علي الكهرباء.. مش عشان الاحتباس الحراري.. لكن عشان الفاتورة.
موظف علي قد حاله