الشعب المصري…مهموم بالأحداث…أو غافل عنها…لكنه الشارع المصري
* لما الأجهزة إللي في المطار ما بتعرفش الحاملين للمرض في فترة الحضانة أمال فايدتها إيه؟.
مستخلص جمركي
* * تعليقا علي ظهور 7حالات مصابة بإنفلونزا الخنازير بعد دخولهم مصر الأسبوع الماضي.
* مش الناس إللي في الزمالك بس هي إللي خايفة من انتشار الفيروس لقربها من بيت طلبة الجامعة الأمريكية…لكن إحنا مع ذلك خايفين نخرج بولادنا.
موظفة
* وأنا مرعوبة أركب تاكسي بولادي لوحدي من إللي بنسمعه عن حوادث خطف الأطفال, ومرعوبة أركب بيهم مواصلات عامة من إللي بنسمعه عن انتشار فيروس إنفلونزا الخنازير…نعمل إيه مش حاسين بالأمان.
سيدة من القليوبية
* هل تعيين رئيسة لجامعة زي جامعة الإسكندرية ثمرة من ثمار خطاب أوباما عن الاهتمام بالمرأة وإعطائها فرص أكثر؟!.
مذيعة
* إحنا إللي عطشانين مع أرضنا إللي بتموت كل يوم من العطش فين المسئولين يشوفوا… لا عارفين نزرع ولا نفلح.
فلاح من المنصورة
* اللحوم المصنعة كان عليها علامات استفهام كثير وبعد موضوع إنفلونزا الخنازير بقي عليها علامة غلط.
سيدة من المطرية
* الناس خايفة تشتري اللحوم المصنعة وبالذات لانشون اللحمة ليكون فيه لحوم خنزير تم تسريبها لسوق اللحوم.
بائع في سوبر ماركت
* لما التوريث يدخل في كل مجال وبالذات في مؤسسات مهمة زي هيئة الطاقة الذرية يبقي هايجي منين التقدم وتكافؤ الفرص؟!!.
إعلامي
* مش كفاية علينا إنفلونزا الطيور والخنازير…كمان قمح فاسد وميه ملوثة…إصحوا يا مسئولين الشعب بيتدمر.
موظف علي المعاش
* الغلا وحب المادة والبحث عنها بأي وسيلة خلوا الواحد يشك حتي في أخوه ابن أمه وأبوه.
رجل مش من الصعيد
* فاتورة الكهرباء بتيجي أول الشهر طب بيعرفوا منين استهلاكنا من الكهرباء قبل الشهر ما يخلص!!.
ربة منزل من العباسية
* كل البلاوي إللي بنسمع عنها من حوادث خطف فتيات أو أطفال أو اغتصاب بسبب التوك توك,الله يقطع التوك توك ويوم ما فكروا يدخلوه البلد.
صاحب محل بحي شعبي