الشعب المصري… مهموم بالأحداث… أو غافل عنها… لكنه الشارع المصري.
* اعتراضنا علي ارتفاع الرسوم القضائية مش من فراغ لأن الراجل الغلبان من حقه التقاضي والحصول علي حقه ولا الفلوس هتعجزه.
محامية
* محدش هيلجأ لنا عشان نترافع عنه..خلاص الغلابة ومحدودي الدخل هايخدوا حقهم بدراعهم وهتبقي فوضي..وإحنا هانشحت.
محام
* حركات الإرهاب ما بقتش تخوفنا ولا ترعبنا زي الأول..إحنا لو لقينا إرهابي واحد في مناطقنا هنقطعه بإيدينا..هي البلد ناقصاهم هما وعمايلهم.
صاحب مطعم بحي أثري
* الحالة الاقتصادية أصلا##نايمة##ما بالكم بعد حادث الانفجار إللي حصل..نقفل محلاتنا ونرتاح أحسن.
صاحب بازار
** تعليقا علي حادث الانفجار بالحسين الأسبوع الماضي.
* لم نلغي عطلتنا وإقامتنا هذه المرة في مصر نتيجة الانفجار إللي حصل في الحسين لأن هذا حادث عارض وليس قاعدة في مصر.
سائح في مصر
* عاوزين الفايدة إللي هياخدها البنك تبقي صفر وكده يبقي كتر خير الحكومة.
مزارع
** تعليقا علي قرار جدولة ديون صغار المزارعين المتعثرين.
* ليه الحكومة بتسيب المناطق تتبني عشوائي..وبعدين يهملوا المرافق ويقولوا أصل المناطق دي اتبنت بطريقة عشوائية.
موظف
* بيوتنا اتخربت بسبب كابلات الكهربا بتاعة الحكومة والماس الكهربي والحريق إللي نتج عنه وآدي الأكشاك بتاعتنا اتدمرت..ومين هايعوضنا؟!.
بائع من الإسكندرية
* خايفين نرجع علي الرصيف تاني بعد ما عملو لنا أكشاك.
بائع آخر
* إيه السر في بيع الشركة المصرية للأدوية وهي بتربح كل سنة ملايين الجنيهات؟.
موظف بالشركة
* موقفنا استراتيجي وبنخدم الصيدليات والمستشفيات حوالينا هيحدفونا آخر الدنيا في أبو زعبل والخدمة كده مش هتبقي سريعة زي الأول وإحنا كمان يعتبر هنسافر لشغلنا ونرجع.
موظف آخر في نفس الشركة