الشعب المصري…مهموم بالأحداث…أو غافل عنها…لكنه الشارع المصري
* الجزارين استغلوا فرصة الأعياد ورفعوا سعر اللحمة بطريقة جنونية,ماهو لوفيه رقابة ماكانش ده حصل.
موظف
* علي فكرة كل عيد بيرفعوا سعر الكيلو الواحد 2 أو 3 جنيه ومين يوقف الجزارين عند حدهم.
ربة بيت
* كل الرعب مش من الامتحانات ولكن من أي أعطال تحصل في مترو الأنفاق وتتسبب في تأخيرنا وتغيبنا عن الامتحان وربنا يستر.
طالبة جامعية
* الأستاذ اطمن إننا دفعنا فلوس الدرس قبل امتحان التيرم وقالنا ده لصالحكوا.
طالب أولي ثانوي عام
* الحكومة بتقول دايما إنها مالهاش ذنب ولا عندها حلول للأزمة الاقتصادية…طب ماهي ممكن تخفض الضرائب علي المبيعات أو الجمارك وبكده تحد من الأزمة.
كاتبة صحفية
* طبعا محدش هيسمع حاجة عن ضرورة تصليح خط الصعيد إلا لما تحصل حادثة جديدة.
محاسب من الصعيد
* بدأت شغلي 12 الظهر بدل 9 صباحا بسبب وقوفي في طابور البنزين والآخر يقولوا البنزين خلص…فاتجهت لبنزينة ثانية وبدأت طابور من جديد!!!
سائق تاكسي
* المدن الجديدة دي مش لينا…لإن سعر الشقق مش بس غالي دي الحياة نفسها والعيشة غالية جدا ماتنسبش متوسطي الحال إللي زينا.
موظف قطاع عام
* عمالين يقولوا فيه أزمة في صناعة السيارات…ورحت أدور علي عربية مناسبة لقيت الأسعار نار نار.
مديرة محل ملابس
* ياريت في مدة الثلاث سنين إللي مدوهم في المنطقة الحرة.الحكومة تعيد النظر في الاستغناء عن نشاط المنطقة دي وتحويلها لمشاريع…ما هي مصر مليانة أماكن ثانية تنفع لمشاريع كثيرة.
مواطن من بورسعيد
* هما مش ضافوا 3 جنيه علي فاتورة الكهرباء…طب فين بتوع جمع القمامة؟!,إحنا بندفع 4جنيه ثانية للناس إللي بتجمع القمامة بعيدا عن وزارة الكهرباء.
مدرسة