في الحقيقة نبحث في مجتمعنا نجد أناسا لا نعلم هل كتب عليهم الزمان والقدر أن يعيشوا منفصلين عن مجتمعهم وأحداثه, أم أن هذا فقرا ثقافيا اختاروا أن يعيشوه للبحث عن لقمة العيش… فبعيدا عن الأحاديث السياسية والبرامج الانتخابية والصراع علي المناصب القيادية وتحرك مجموعات الشباب التي تنادي بالتغيير وغيره من القضايا, فهناك فئة كبيرة (مع نفسها) كما قال كيرلس شكري وهو شاب في مقتبل عمره ومهنته دقاق وشم يظهر في الموالد وينتقل بينها من مولد السيدة العذراء بمسطرد إلي مارجرجس بميت دمسيس وغيرها من الموالد… ولأنه واحد من الشارع المصري فهو جزء ويمثل فئة من فئاته له أراؤه وطموحاته التي يجب أن يسمعها المسئولون حتي يعرفون أن هناك من لا يعرف شيئا عنهم وعن بلدهم, ومع احترامنا لكل الشخصيات اللامعة في بلدنا فهم لا يعرفونها ولا يدركون ما نشاطها… فهل ذلك مسئوليتهم؟ أم مسئولية مجتمع يجب أن يصل لهؤلاء؟… فعودة لكيرلس شكري وهو يجلس في مولد السيدة العذراء بمسطرد – يمسك أدواته الإبرة والألوان والحبر الشيني والماكنة.. فيقول:
* أنا هاوي رسم أصلا… فالمهنة دي بتخليني أرسم وأطلع إللي جوايا في رسومات مختلفة.
* أنا مش متعلم, لكن أخويا الكبير علمني اقرأ وأكتب وباحاول اقرأ حاجات علي قدي.
* مهنتي الأصلية ترزي, لكن باستغل فرصة الموالد واشتغل في الحاجة إللي بحبها وآكل عيش منها.
* الرسومات بيختلف سعرها علي حسب الرسمة والألوان ونوع الزبون, يعني فيه صليب بخمسة جنيه لحد رسمة كبيرة وألوان بأربعين جنيه.
* بنتقل أنا وكل البياعين والدقاقين بربطة المعلم للمولد إللي بعده في مارجرجس ميت دمسيس وغيره والرزق يحب الخفية… وكمان أيام حد الزعف وشم النسيم.
* مهنتنا دي وراثة بناخدها من بعض ونسلمها لبعض وإللي يحب الرسم والفن هيطلع أحلي شغل.
* لأ… فيه رسومات غير الصليب والعذراء ومارجرجس, فيه نسر وقلب وخروف وحاجات تانية للشباب إللي عاوز يهيص مع نفسه.
* ماليش في كلام الانتخابات أنا مع نفسي.
* بأضحك عشان الانتخابات والكلام ده, لما بنسمع عنها بنقول هي الناس دي واخدة المواضيع علي أعصابها ليه… ما الدنيا بخير طول ما الرزق حلال.
* لأ صراحة مش بقرأ جرايد أنا يدوب بقرأ وأكتب علي قدي وما بحبش الجرايد والكلام ده.
* بتاع إيه البرادعي ده… ولا عاوز أعرف.
* بصي أنا دخلي الحمد لله كويس وبحوش عشان أتجوز لكن فيه ناس غيري تعبانة قوي.
* الشباب بيشموا عشان مش لاقيين شغل ولا حد بيسأل فيهم بيعملوا إيه… أهو كبت وبيطلعوه.
* نفسي يبقي عندي عربيتين… عشان أغير فيهم.
* بحب أتفرج علي المصارعة الحرة وشوية أفلام… ولا برامج ولا نشرات أخبار.
* طول ما الواحد بيشتغل كويس وماشي مستقيم يخاف من إيه!!.
* لو شفت الريس هقوله فيه ناس ضايعة كثير والمزاج عند الشباب بيزيد لأنها مش لاقية شغل ومش حاسة إن ليها لازمة في البلد.