أبراج بتئن وكنيسة بتبكي
وجرس بيرن ويصرخ ويشكي
وشباب بيموت مكتوم الصوت
وصوات وعويل وكلام مغلوط
وبنات وولاد بلا أي ميعاد
شايفين الدنيا سواد في سواد
والنار بتطل من فوق الكل
بتاكل صورة مريم والطفل
وصليب مكسور ومسيح مقهور
وقبطية بتدعي الغمة تغور
يارب نهار جديد نوار
يزيح الضلمة والجور والنار
يارب يا معبود ياسر كل وجود
أنت الشاهد علي كل شهود
زيحي يا كنيسة أحزانك الكبيسة
واطلق يا جرس دقاتك الحبيسة
قسم مني طالع أحميكي كأي جامع
وأصونك زي بيتي وأحوطك وأدافع
يا كنيسة يا باكية ياجرس يا حزين
يا عذراء يا باقية بطول السنين
بكرة حيبقي أحسن وأحلي من كده
دي المحبة لسه لقلوبنا موحدة