الشعب المصري.. مهموم بالأحداث.. أو غافل عنها.. لكنه الشارع المصري
* كام واحد من القيادات راح يعزي قداسة البابا في ضحايا ماسبيرو وكام واحد منهم راح يعزي أهالي الضحايا؟!
صحفي
* معقول يبقي المتظاهرين بتوع ماسبيرو منهم إللي استشهد ومنهم كمان إللي اتقبض عليه.. وكام واحد من البلطجية والقاتلين اتقبض عليهم!!
مدرس
* مهما كان اعتراض الطلبة علي أي نظام لكن احترام الأستاذ واجب واحنا رافضين إللي حصل.
طالب جامعي
* * تعليقا علي أحداث جامعة المنصورة وأكاديمية أخبار اليوم ومظاهرات الطلاب ضد قيادات الجامعة.
* بيقولوا الشعارات الدينية ممنوعة يجوا عندنا ويشوفوا الكلام ده هايتنفذ ولا لأ.
مواطن من حي شعبي بالقليوبية
* هي مصر رايحة علي فين مدنية ولا دينية ولا عسكرية؟!
موجه لغة إنجليزية
* إحنا عاوزين نسافر لكن صعبان علينا بلدنا إللي بنحس فيها بالدفء لينا ولأولادنا.. لكن حال البلد ما يسرش.
مهندس متزوج
* مش بنتظاهر عشان زيادة رواتبنا.. عشان إهدار المال العام في الشركة.
موظف بالمصرية للاتصالات
* مش عاوزين غير لقمة هنية وهدمة نظيفة وولادنا يتعلموا ويبقوا حاجة كبيرة بكره وبعده.
غفير مدرسة حكومة
* بنطلع مساعدات لدول مختلفة شئ جميل.. لكن جحا أولي بلحم توره مش كده ولا إيه!!
موظف
* فين الجاني في أحداث القديسين والعمرانية وإمبابة والماريناب وماسبيرو……؟!
كاتب
* هما هايخلوا امتحانات التيرم قبل الانتخابات ولا بعدها؟
ولي أمر إعدادي وابتدائي
* فين الوحدة الوطنية إللي كانت موجودة في ميدان التحرير؟ إيه إللي حصل والنفوس اتغيرت فجأة ليه؟!
باحث
