رسالة الي سيادة وفخامة السيد الرئيس عبد الفتاح السيسي من مواطن مصرى..واخترتك ريس وقلت هو دا .
هو دا الاسد اللي هايرعب الغابه كلها وهايوقف الارهاب ويدمر معاقل الاخوان والتطرف .
هو دا اللى هايجيب حق دم شهدائنا كشح واسكندرية و..و..
وفجأة زادت الطينة بله.. ونسكت ونقول احسن من غيره..
وصرخنا وقلنا حقنا ياريس..وشكرا ياريس جيت وعيدت علينا في الكاتدرائية بعد ضربات الارهاب المتكررة ودول مش مصريين اللي كانوا في ضربة ليبيا.. وضرب الكنائس البطرسية وطنطا والاسكندرية ده عمل فردي..ممكن يكون شخص معتوه.
وصرخنا وقلنا ألحق ياريس في اربع أطفال بيمثلوا طريقة داعش قالوا عليهم ازدراء اديان وحبسوهم..ادخل يا ريس ..وافرج عنهم ..لكن راحوا الولاد وضاع مستقبلهم..
وصرخنا وقلنا ألحق ياريس في مدرسة شرحت جزء في التاريخ يعني قالت كلام معجبش بعض الناس اتهموها برضوا بجريمة اللي يفتح بقه يبقي ازدراء اديان لكن برضوا مسمعناش الريس وضاع مستقبل مدرسة مسكينه اتحبست ولا حول ولا قوة لها.
وكتير حقوق ضايعه..والسبب معروف.. بلاش نحط راسنا في الرمل كالنعام .
ولما فضيلة شيخ الازهر لم يستطع تكفير داعش .. ويقول النصاري كفروا بدينى.. يعنى افهموها انتم.. ويطلع الشيخ سالم عبد الجليل وبرهامي وغيره ويكفرونا عيني عينك ويقولوا اننا دين فاسد ، ومازالوا أحرار طلقاء ويجولون يبخوا فى اذن الناس.. يعني ده مش ازدراء اديان !
والنهاردة سمعوا كلامهم وضربوا الكفار بالنار … بس دول مصريين ولابسين ملابس داعش وراكبين عربيات معروفة وسلاح كتيرمعاهم .. يعنى كده خطر.. يعني دول عايشين وسطينا خلعوا ملابس داعش وممكن بكرة ينفذوا عملية تانيه.. وتالته..
يا بلدنا اصحي وفوقي..عارف ليه بيحصل ده يا ريس علشان حقنا مهضوم . مافيش واحد اتحكم عليه في قضية تعدي علي مسيحي.. حتي الست اللى اتعرت واتسحلت حقها ضاع والراجل اللي عمل كدة براءة!!
ياريس وانا النهارة بنادي بصوت عالي ..حقنا ياريس ..ياريس دمنا ياريس.. ياريس
ولا اقول لسيادتك، احنا لينا رب ياخد حقنا وهو بيسمع وبيشوف وبيحكم بالعدل..واحنا منتظريين حكمه..اكيد بيصبر ولكن في النهاية حياخد حقنا بالعدل ..
وبنقول ربنا موجود.. يارب..يارب قولوا معايا يارب.. يارب