وانا في رحلتي النهارده جوه العربية سمعت واحد في الراديو بيتكلم عن فُلك نوح. ..
انا عمري ما فكرت في الُفلك ..دايمًا بناخد القصة على الطوفان ..على وعد ربنا ..على كل المخلوقات اللي ركبت جوه الفٰلك ..على شخصية نوح و كفاحه في البناء-زي ما الراجل في الراديو كان بيقول- وكل القصة دي الى اخرها بس مين فينا ركز في المركب الضخمة دي !!
طول السكة و انا قاعدة أفكر ان اكيد وراها حكمة، بس مش واصلة لي لسه ..
ليه ما يكونش الفُلك ده حياتنا .. وده المركب اللي حنملاه بأعمالنا و تجاربنا وحنفضل فيه لحد ما نخلص مشوارنا و نبدأ بدايتنا الجديدة !!
دايمًا بقوله يا رب قود سفينة حياتي ..بس ما اخدتش بالي انه مأمني علي الُفلك كله ..انا اللي بختار مين يدخل و يخرج من حياتي انا اللي ببنيه طول ما انا عايشة و بملاه بكل نفس مني ..كل أعمالي وافكاري و تصرفاتي و طباعي جوه ..ما حدش من بره شايف غير مركب ماشية و بس ! بس جواها عالم تاني خالص !!
كلنا عندنا ُفلكنا .. كل واحد بيقود الليلة كلها بنفسه .. ربنا صحيح بيوجهنا وهو ظابط الكل بس في نفس الوقت سايبنا نتحكم في فُلكنا اللي حنعدي بيه للبر التاني ..
خد بالك علي فُلكك ..خد بالك مين واخده معاك في طريقك..خد بالك وكن امين على القليل ليقيمك الله علي الكثير
خد بالك ..انت ما تعرفش امتي حيجي الطوفان !! امتي لازم تسلم الأمانة ..وترسى بأمان ..
خد بالك..ماحدش مسؤول عن حياتك ..غيرك
#تكفيك_نعمتي