جربت اعمل خلطة كده من كمية منظفات عندي في البيت علي بعض .. واحد ريحته بحبها قوي بس مش بينظف خالص والتاني بينظف بس مش بحب ريحته بموت منها اصلاً.. لخبطهم علي بعض وقعدت ارج ارج في الازازة بكل حماس بقى للاختراع الجديد لحد ما ضربت في وشي الازازة!
ما اعرفش ليه فارت كده مرة واحدة، وياريتها طلعت حاجة كويسة.. ريحتها كانت غير محتملة! قعدت اكح لحد ما فطست ..
احنا بنعمل كده كتير في نفسنا لما ما نبقاش راضيين عن شكلنا او شخصيتنا .. بنحط حاجات مش نافعة مع بعض وممكن تتفاعل كيميائياً و تطلع حاجة ضايعة في الاخر و تضرب في وشنا ووش اللي قدامنا ..
ربنا خلق كل واحد بشكل مُعين و شخصية مُعينة.. مش غلط طبعًا نحسن من شكلنا او نضيف حاجات تقوي شخصيتنا، بس الغلط نحاول نبقى صورة غير اللي اتخلقنا عليها .. نخطلت مع حاجات مش مناسبانا..
قال لنا: “كل الأشياء تحل لي لكن ليست كل الأشياء تناسبني”.. ممكن تتعامل مع اللي انت عايزه بس ما تتأثرش بحاجة مش مناسباك او متفقة مع كيانك .. ما تحاولش تبقى نسخة او تقليد..حاول تكون انت .. لأن وجودك و كيانك في الحياة مش صدفة.. انت ليك رسالة بشكلك ده وشخصيتك دي..
كل حد تقابله حاول تتعلم منه حاجتين ..حاجة كويسة تكتسبها وحاجة تتجنب وجودها فيك يعني احلى حاجة فيه وأوحش حاجة فيه .. خد شوية صغيرة من كل حاجة بس ما ترجش نفسك .. ممكن تطور نفسك و تتجنب اللي ممكن يضايق اللي حواليك بس اهم حاجة تركز و ما تديش فرصة لحد يبهت عليك ويغير تركيبتك الأساسية ولا يهز كيانك، والا في الاخر هتنفجر و تبقى ولا شكل ولا لون ولا ريحة ولا اي حاجة.. حاجة كده مش هتنفع حد ولا حتى نفسها .. نسخة مش اصل .. غير صالحة او مفيدة..
اقبل نفسك زي ما ربنا خلقك علشان عمرك ما هتقدر تعمل تركيبة لشكلك او شخصيتك احلى او أقوى من اللي هو عملها..
#تكفيك_نعمتي