وانا شايفة اكتر من ٧ انواع نباتات داخلة في بعض ..و مبسوطين و مش معترضين و مظللين علي بعض ..فكرت في خليقة ربنا الأسمى.. اللي هي الانسان.. وحزنت قوي ان البشر بكل الجمال اللي ربنا خلقه فينا مش عارفين يعيشوا مع بعض زي ما الزرع عايش و متعايش رغم اختلاف الأنواع و الألوان ..
ليه ما نبقاش زي الجنينة حتي لو في وسطنا صبار و شوك؟ اختلافنا عامل صورة حلوة.. بس عدم تقبلنا للآخر هو اللي مشوه الموضوع كله.. ليه ما نحبش بعض و نحتضن بعض و نستر على بعض؟ ليه مش كل زرعة فينا راضية بحالها و متقبلة جيرانها باختلاف أصولهم و ديانتهم؟
ليه مش قادرين نشوف الصورة من بعيد ان الاختلاف ده عامل نوع خاص من الجمال و الروعة؟ كل وردة ليها شكل خاص و ريحة مختلفة.. طالعين جنب بعض و مش بيخنقوا بعض ولا هدفهم يبانوا احلى من اللي جنبهم.. ولا ربنا خالق نبات وصي علي نبات تاني جنبه.. بالعكس سخر البعض لحماية البعض الآخر.. خلق الشجر الكبير علشان يظلل علي الصغير و يستر عليه.. وخلق الصغير علشان يكون قريب منا ويملى كل الفراغ تحت الشجر ويكمل جمال المنظر.. كل حاجة ليها مكانها و دورها ..
للأسف البني آدم مش طايل يكون بحلاوة و نقاوة الشجر و الورد و النباتات..
احبوا بعضكم بعضاً.. خلينا علي الصورة الحلوة و التعايش اللي ربنا عايزنا نكون عليه ..
خلينا زي الزرع .. نكبر جنب بعض.. نتداخل و نتعايش من غير ما نخنق بعض..
#تكفيك_نعمتي