“ميرا” موهبة في العزف والترنيم وتعشق التقليد

2017-06-25 (02:10 PM)

مريم رفعت


تنبيء الطفولة بما يرسمه المستقبل، للطفل الذي وهبه الله مواهب جميلة نتمنى أن تظل وتكبر وتنمو؛ كي تكون مثمرة فيما بعد.

ومن هذه الشخصيات “ميرا”، وهي الطفلة التي جمعت بين البراءة والشقاوة، بالإضافة إلى أنها تمتلك عدة مواهب منها الصوت الجميل، والرسم والتلوين، فضلا عن تعلمها العزف على آلة “الأورج”. كما أنها تجيد “التقليد”.. فتحدثت إلى “وطني” عن مواهبها في حوار خاص.

ميرا احكي لنا عن نفسك وأسرتك؟

اسمي ميرا ناصر وماما اسمها مريم وأخويا اسمه باسم هو في أولى إعدادي.. لما بصحى الصبح بغسل وشي وبعدين أفطر، وبلعب واتنطط، وبتفرج على التليفزيون وبلعب بالعروسة بتاعتي، اللي بحبها كتير عشان هي صحبتي وساعات بَخرج مع ماما، لكن في المدرسة اليوم كله دراسة وكتابة الواجب ومش بلحق ألعب كتير.

بحب بابا عشان بيشيلني على كتفه ويلف بيا في الشقة، وبحب ماما عشان بتفسحني وبتحكي لي حكايات، أما أخويا باسم رغم أنه ساعات بيرخم عليا لكن بحبه عشان جاب لي هدايا كتير في العيد اللي فات من العيدية بتاعته.

وعلى فكرة أنا عندى أورج بتعلم العزف عليه وعندي ألوان وبحب الرسم ورسمت بيت وشجرة وبابا وماما.

 

سمعنا إنك أخذتى المركز الأول فى الصوت الحلو على مستوى المدرسة صحيح ياميرا؟

 أيوه أخذت المركز الأول على المدرسة واخذت شهادة تقدير من مديرة المدرسة

 

وبتمارسي موهبتك الحلوة دي فين؟
**أنا في كورال أمجاد السماء كيدز في الكنيسة بتاعتي، وشاركت في عروض قدام البابا تواضروس في الكاتدرائية في العيد، و قولت ترنيمة “أتمنى لو أكون خروف صغير” صولو، وكمان قدمت في عيد القيامة واتصورت مع البابا بس حصل حتة موقف!!

 

ايه اللي حصل؟
**وأنا بسلم على البابا اتشنكلت ووقعت على الأرض فالبابا قومني من على الأرض ونفض لي هدومي وخدني في حضنه وإداني شيكولاته كتير.

 

بتسمعى ترانيم؟
أيوه وحافظة ترانيم كتير وبحب ترنيمة “اختبرتني إلهي” وبعرف أقولها لأني بسمعها كتير.

 

اسم الميس بتاعتك في الكورال إيه؟
اسمها مس كريستين وأنا بحبها أوي عشان هي بتحبني وبتلاعبنا بعد البروفة.

 

ميرا احكي لنا عن أصحابك؟
**أنا عندي أصحاب في الكورال -و كلهم بنات بس-لأن الأولاد بيعملوا شقاوة، وفي المدرسة عندي أصحاب أولاد وبنات وبيسمعوا الكلام زي مارك وإياد وماريا وسارة.

 

إيه أكتر حاجة بتحبيها في المدرسة؟
بحب “البريك” وبحب أنزل ألعب في “حوش” المدرسة.

 

طب أكتر حاجة بتضايقك؟
إن الميس بتزعق بصوت عالِ كل شوية

 

طلعتي رحلات في المدرسة؟
طلعت رحلة مركز الطفل، ونفسى أروح حديقة الحيوان عشان أشوف الأسد والزرافة.

 

لما تكبري عايزة تكوني إيه؟
عايزة أطلع دكتورة

 

 تقولي لأخوكي إيه؟
أقوله مش بحب لعبة “كروس فاير” وبطل تلعبها علشان مش كويسة علشانك.

 

قولى لنا بقى قلدتى مين؟
أنا بقلد باسم أخويا وبقلد بابا وهو بيزعق وماما وهي عصبية، وكمان بقلد شخصيات في أفلام الكارتون بحبها.

 

 

30

التعليقات