لقيت أن دايماً الناس بتتكلم على حواء أو البنت بتدور على أيه في العلاقة ونادراً -ده لو موجود أصلاً- حد بيتكلم على أيه اللي آدم أو الراجل بيدور فيه على العلاقة مع أن حواء لا تعيش لوحدها, وزي ما ليها إحتياجات برضه الراجل له إحتياجات.
أذا أخدناها من المنظور الديني هنلاقي أن ربنا كان دايماً بيقول أن ربنا خلق حواء معين نظير لأدم والمعين ده طبعاً لازم يكون متوفر فيه شوية حاجات، ما ربنا أكيد خلق حواء وهو موفر فيها سمات المعين ده.
المعين هو الشخص اللي بيقبلك رغم عيوبك وميجرحكش بيها،فمن حق المعين أن يقول لك عيوبك ولكن بالطريقة الحلوة والكلام الطيب، مش ترميها دبش فتجرح اللي قصادها.
المعين هو حد بيفهم اللي قصاده من غير ما بيتكلم، في دراسة اتعملت من فترة كبيرة كانت بتقول أن الراجل بيتكلم في حدود ٧٠٠٠ كلمة بينما الست بتتكلم ١٥٠٠٠ كلمة على الأقل، وببساطة فعلاً الرجالة مبتقدرش تعبر بالكلام زي البنت بس ده نتيجة أنهم مش بيتكلموا كتير زيهم.
فشطارتك أنتي في أنك تفهميه حتى لو مش بيتكلم، وتفهمي هو بيفكر ازاي أو عاوز أيه؟، وصدقيني مش صعب خالص أنك تعرفي تميزي طريقته أو أسلوبه في التفكير أو المواقف.
المعين بيبقى دايماً مع الشخص وعينه عليه وخايف عليه بس مديله مساحة خاصة شوية، يعني بلاش شغل المخابرات أو التفتيش في الموبايل، لأنه لو بيخون سهل تعرفي من طريقته اللي بقيتي بتفهميها، وهكذا الشات ما بينه وبين اصحابه
غير بقى أن أدم دايماً ربنا كان بيقول عليه رأس المرأة، فهو دايماً حابب يحس بكده جداً، حتى لو موفرة لنفسك الإستقلال، يحب يحس أنه برضه قائد السفينة وبيقود.
يعني صدقيني لو شاركتيه في كل كبيرة وصغيرة هيتعلق أكتر بيكي لأنه بقى عارف أنك محتاجاه تاني حاجة لأنك بتحسسيه أنه في مكانة حلوة جداً في حياتك كأنه باباكي وده بجد بيفرق جداً معاه.
بس نصيحة قوليله الحاجة بايجاز يعني لو بتحكيله مشكلة متقوليلوش تفاصيل ملهاش لازمة زي أن وقت الخناقة كان المدير بيكلم مراته في مكتبه وحصل بينهم كذا وكذا والخناقة أصلاً بينك وبين الساعي على حساب الحاجات اللي كنتي واخداها طول الشهر.
ولازم تحسسيه دايماً أنه فارق معاكي، بلاش تستخسري فيه كلمة بحبك أو كلام الحب، صدقيني إحنا برضه بنحب نسمع الكلام الحلو.
غير كمان أنك تقدري تكسبيه لما تحسسيه دايماً أنك هتفضلي جنبه مهما حصل أو مهما عمل، الرجالة برضه بتخاف تتكسر زيك بالظبط مش أنتي بس اللي بتخافي من أنك تتكسري، الراجل لو حب فعلاً بيتحول لطفل متعلق فيكي.
وأهم حاجة وأوعي تنسيها أنك تحبيه وتهتمي بيه جداً، أي راجل بيدور في حبيبته على مامته، هو بيدور فيكي على .الوطن والحب، فاياكي تخليه يتغرب عنك لأنه ساعتها هيعمل لجوء في حياة بنت تانية وهتخسروا بعض