من داخل ساحات المحاكم تسمع آهات و شكوى النساء .. ليس النساء فقط و لكن الاشد ألماً ووجعاً هو آلام الأطفال.
بحس بوجعى في ألم إبنى و هو بيقولى جعان يا ماما ..جعان يا قلبى, خلاص هانت البيه القاضى هيجبلنا حقنا … هو مين القاضى ده يا ماما هو إنت إتجوزتى حد تانى غير بابا !!! قلبى بيتعصر إبنى ضنايا يا ناس !!!!
من الوجع بيموت و هينداس .. يا سعادة القاضى سايق عليك النبى لتقول لأبوه يبعت الشهرية .. شهرية إيه يا ست قبل التحرية . تحرية إيه يا بيه !!!!بقولك أنا و إبني يا بيه مش لاقين ناكل نعمل إيه .
روحى إعملي تحرى و تعالي… تحري تاني يا بيه!! ما إتحكم لينا بمتين جنيه أعمل بيهم إيه و لا أسكن بيهم فين و لا ألبسه منهم إية و لا أعلم بيهم فين !!
دماغي يا ست الرول اللى بعده إيه .
الرول اللى بعده يا بيه جوزى بيضربنى يا بيه و مخلفتش منه , أخلعه و لا أعمل إيه ؟؟؟ هترمى فى الشارع يا بيه . أمى و أبويا عند ربنا و معيش شهادة أشتغل بيها و أعمل إيه ؟؟؟ إنجدنى يا سعادة البيه و قولى أعمل إيه .. أعمل طلاق للضرب و لا أخلعه يا بيه.. و لو إطلقت هترمي في الشارع يا بيه يأتحمل و ينداس عليا و في الأخر هتكون النتيجة إيه ؟؟
مأساه نسائية جزء منها بسبب قانون الأحوال الشخصية الغير منصف و التى تغفل الحكومة المصرية عنه عمداً، و لا تعمل على تعديل نصوص مواده حتى تنصف النساء و الأطفال من تعنت الرجال في القيام بواجبتهم الأسرية .. قانون الأحوال الشخصية أو ما يعرف بإسم قانون الاسرة لا ينصف النساء و لا يضمن لهن و لابنائهن حياة كريمة.. فهل يعقل أن تكون نفقة الصغار مائتان جنيها ً في عام 2015 !!! شاملة المأكل و الملبس و المشرب!! هل يعقل أن يكون أجر المسكن الذى يعيش فيه الصغار مأئة و خمسون جنيهاً و أحيانا أقل في زمن وصل فيه أقل قيمة شقة إيجار قانون جديد سبعة مائة جنيهاً (ستون متراً) ؟؟؟ من هو المسئول عن تلك المأساه التى يدفع ثمنها أطفال أبرياء لا ذنب لهم سوا انهم ولدوا من بذرة رجل قاسى ؟؟ و ماذا عن دور الحكومة و تعنت بنك ناصر أحيانا فى الصرف و إمتناعه عن سداد نفقات الصغار و نفقات النساء عن شهور سابقة .. تابعونا الأسبوع القادم ..